كحك العيد 
:smi39:
ده ملف لجميع انواع حاجات العيد

اولا : -
طريقة  للكحك بالتفصيل 

المقادير: ده كحك دايب مش قوى
 
1 كيلو من الدقيق الفاخر
ذرة من الملح
1 ملعقة كبيرة من البيكنج بودر
ملعقة كبيره من الخميرة الفورية او خميره بيره زى الليمونه
2 ملعقة كبيرة من السكر معلقه مع الخميره او اقل و الباقى مطحون مع الدقيق
450 جرام (يعنى نصف كيلو سمن الا 50 جرام ) او نصف كيلو على حسب الدقيق المستعمل ) من السمن المفضل ليكم الافضل تكون بلدى عشان يكون طعمة حلو او مخلط بسيط و يكون سمن مش زبده وممكن الطريقه على البارد
1 ملعقة كبيرة من رائحة الكحك او محلب مطحون ويباع عند العطارين + سمسم ربع كوب محمص
ملعقة صغيرة من الفانيليا
كوب مج من الحليب
نصف مج من الماء
او نصف من كل نوع على حسب الدقيق كل ما تخفى السائل يكون دايب
كل ما تزودى الميه و تقللى السمن هيكون الكحك ناشف / قللى الميه و زودى السمن الى 550 او 600 جرام
ده بقى يبقى دايب خالص ميتمسكش و انتى و راحتك
 
 
طريقة الكحك
:smi39:
نضع السمن علي النار حتي تصل الي الغليان وممكن الطريقه على الباردبس الطريقه دى السمن المقدوح بتقعد مده اكتر مش بتغير الطعم
نضع الخميرة و معلقه سكر في قليل من الماء الدافئ حتي تتفاعل الخميرة بحكم حرارة الجو والماء الدافئ والسكر و ترتفع
نحمص السمسم او نحطه فى حفره فى وسط الدقيق و نضع عليه السمن بيغلى فيتحمص
نجهز وعاء للعجين ونضع فية الدقيق المنخول ومعة السمسم وريحة الكحك وذرة الملح ومعلقه كبيره سكر بودره
ثم نضع السمن بالتدريج ويتم فرك الدقيق باليد
مع السمن كويس جدا اللى هو نبسه يعنى و كل ما تبسى اكتر يبقى دايب اكتر حتى يختلطوا مع بعض ثم نضع قليل من الماء ثم نضع الخميرة ثم نضع الفانيليا
ونعجن العجين مع وضع قليل من الحليب وقليل من الماء
حتئ تكون عجينة لايابسة ولا طرية هتكون مفروكه شويه بس متعجنيش كتير بعد وضع المايه لو احتجتى { 50 جرام سمن } لمى بيهم العجينه
و نشتغل على طول علشان تبقى سهل التشكيل و نغطي العجين بكيس بلاستيك و احنا بنشتغل
:smi39:
نكون مجهزين الحشوة وهى ملبن اوعجميه زى ما تحبى
 
وتجهيزة بسيط للملبن
---------------
200 جرام من الملبن نضيف عليهم فستق وقليل جدا من السمن والحشوة متروكة ليكم كل دة حسب رغبتكم
اوتحشى عين جمل
او يحشى بالعجميه و هقولكم على طريقتها
طريقة عمل العجميه لحشو الكحك
 
 
مقادير العجمية:
:smi39:
2 ملعقة كبيرة سمن
2 ملعقة كبيرة دقيق منخول
ملعقة سمسم منقي ونظيف
2 ملعقة صغيرة رائحة كعك
كوب عسل نحل أبيض
2 ملعقة جوز مفزي خشن أو فستق ويمكن الاستغناء عن المكسرات
ممكن تضيفى قطعة ملبن تتقلها
---------------------
الطريقـــــــة -- 
 
ـ جهزي العجمية بتسخين السمن في طاسة كبيرة مستديرة حتي تلين وتهدأ النار ثم يضاف الدقيق ويقلب حتي يصير لون الدقيق دهبى غامق فيضاف السمسم وترفع الطاسة من علي النار ويضاف العسل مع التقليب المستمر تدريجيا ثم يعاد إلي النار ويقلب حتي يغلي علي أن يكون لينا وتضاف رائحة الكعك والمكسرات إن وجدت ويمكن الاستغناء عن المكسرات ثم يرفع فورا من علي النار حتي تهدأ حرارته ويبرد بوضعه قليلا بالثلاجة حتي يتماسك.
ـ تقطع العجمية دوائر صغيرة في حجم البندقة الكبيرة بقشرتها واحتفظي بكرات العجمية لحين الحاجة إليها وذلك يسهل عملية الحشو وسرعتها.
لازم تكون مستويه كويس علشان متفورش جوه الكحكه و تبوظها
---------------------------------------------
نقطع العجينة قطع متساويةو ندلكها ونضع داخل كل قطعة قليل من الحشو وتلف باليد حتي تكون الحشوة بالمنتصف وممكن تعمليها بالمنقاش او بقطع البلاستيك الجاهزة
او تكورى العجينه و تضغطيها على مصفى الزيت المربعات و دى اللى انا بعملها علشان متبقاش مكتومه و هوريلك شكلها فى التعليق او يضغط عليها بالبصامة
-----------
نجهز صينية الفرن ونمسحها ونضع بالقالب حبات الكحك ويرص في الصينية حتي ننتهي من الكمية
يغطي ويترك ليخمر مرة ثانية لمدة 4 ساعات اواكتر
نولع الفرن علي درجة حرارة 175 درجة وندخلهم الفرن
مدة 20دقيقة حتي يصبح ذهبى اللون
نضرب سكر بالمكينة حتي نحصل علي سكر بودر ليرش اثناء التقديم او اول ما يخرج من الفرن يرص الكحك ويرش عليه السكر بالمنخل
الشكل ده من النت انا لسه معملتش
وبالهنا والشفا 
 
:smil 42:
الكحك بطريقه تانيه على البارد و اختارى السهل ليكى
 
الكحك ع البارد
 
1ك دقيق
1/2ك سمن
نص كوب ميه لو عوزاه ناعم اوى
او كوب ميه لو عوزاه ناعم محمل
1ملعقه كبيره خميره فوريه
1ملعقه صغيره بيكنج بودر
ملعقه كبيره سكر بودره
ملعقه كبيره سمسم
1ملعقه صغيره محلب او ريحت كحك
الطريقه
-------------
السمنه تكون سقعه من التلاجه
هنضرب السمن مع السكر البودره لحد ما تكون زى الكريمه ولونها يكون مائل للبياض
هننزل بالدقيق اللى عليه السمسم و السكر و البيكنج بودر والمحلب
ونبسهم كويس مع السمن
وبعد كده نقلب الخميره فى الميه وننزل بيها على الدقيق
ونلم العجينه من غير عجن نكمل بالبس مش عجن
و نسيب العجينه ترتاح ربع ساعه وبعد كده نشتغل فيها على طول ونشكله ويدخل فرن على 170 الى 180 المده من 25 الى 30 درجه
لحد ما ياخد لون دهبى من تحت
وبعد كده لو عاوزه لون نشغل الشوايه علشان ياخد لون حلو وبالهنا
و التفاصيل فى الوصفه اللى فوق --
نرجوا الدعاء 
:smil 42:
طريق تانيه للكحك على البارد
 
المقادير
 
كيلو دقيق
50 جم دقيق سمولينا
50 جم سكر
10 جم ملح
10 جم رائحة كحك
20 جم بيكنج باودر
400-500 جم سمنة باردة
200 مل لبن
خطوات التحضير
------------------------
اخلطي الدقيق مع السكر والملح ورائحة الكحك والبيكنج باودر اضيفي اليهم السمن واخلطيهم و بسيهم حتى تصبح مثل حبات الرمل اضيفي اللبن واعجنيها جيدا حتى تتماسك شكليها على هيئة اسطوانات ثم قطعيها حلقات حسب الحجم المناسب وكوريها يمكنك حشوها بالعجوة أو الملبن واغلقيها ثم استخدمي بصامة الكحك لزخرفة وجهها ضعيها في صينية فرن وادخليها فرن متوسط الحرارة، بعد خروجه من الفرن رشي على وجهه سكر بودرة
ثم قدميه و بالف هنا و شفا
 
 
:smil 42:
فى عمل الكعك
 
فيه شوية حاجات عايزه اعرفهالكم
ا - بنحط شويه سكر بودره فى العجين ليه علشان بينفش الكحكايه و يخلى لونها وردى
2 -بنحط بيكنج بودر مع الخميره ليه علشان تنفش و تخلى الكحكايه مش مكبوسه
3 -بنعمل السمن مقدوح ليه علشان لو قعد مده و عامله كميه كبيره ريحتها متزنخش
لو هتعمليه على البارد يتاكل على طول
4 -لازم تكون العجميه مستويه كويس علشان متفورش جوه الكحكه و تشقها
و تبوظها ده الكحك كله و طرق عمله
 
:smil 42:
طريقة عمل القراقيش الناعمة سادة و بالعجوة { المنيين بالعجوه }
:smi39:
المقادير 
------------
نفس مقادير الكحك بس بنزود السائل سواء كان لبن او ماء
وده بيخليها ناعمه و هشه و ماسكه نفسها فى نفس الوقت
و نبسها و نعجنها زى الكحك بالظبط بس بنزود اللبن
لغاية ما تتكون عندى عجينه طريه سهلة التشكيل
عجوه بدعكها بسمنه و سمسم محمص
نفرد العجينه رول و نضع جواها العجوه ونعملها اسطوانه و نبططها
و نقطعها بالعرض صوابع
و اعملى بقى اشكال جميله زى ما انتى عايزه
و نسيبها تخمر
ونحضر بيضه و معلقتين لبن و فانليا او رشه قهوه و نضربهم حامد
ندهن الوش بالبيض و نرش سمسم على عليها
و بالف هنا يا حبايبى
 

:smil 42:
البيتى فور
 
اولا المقادير:
:smi39:
- 4 كوب دقيق
- 2 كوب زبدة
- كوب سكر بودرة
- بيضة + صفار بيضة -- او 2 بيضه كبار
عايزاه دايب خالص حطى صفار 2 بيض فقط
- 1 ملعقة بكنج بودرة
- فانيليا
- ذرة ملح
- 2 ملعقة كاكاو
ثانيا طريقة التحضير:
==========
- يخفق السكر مع الزبدة حتى يصبح هشاً ثم نضع البيض و الفانيليا و تخلط ثم نضع الدقيق مع البكنج بودر و ذرة الملح و يوضع مع الخليط جزء جزء .
- نقسم العجين الى قسمين : قسم ابيض و قسم نضع عليه الكاكاو و 1 ملعقة لبن ثم تشكل و تسوى فى فرن متوسط الحرارة حتى يصبح لونها ذهبياً و يرفع من الصاج و يترك حتى يبرد ثم يزين.
و بالف هنا ليكو
 
:smil 42:
طريقه تانيه جميله

بتى فور ناعم جدا بطريقة 1-2-3-4
=====================
جيبالكم طريقة بتى فور ببيطلع ناعم وجميل
وهى طريقة ال (1) - (2) - (3) - (4)
اولا ال (1) وهى 1كوب سكر ناعم
ثانيا ال(2) وهى 2 كوب زبدة ساقعة جدا من الفريزر
ثالثا ال(3) وهى 3 صفار بيض
رابعا ال (4) وهى 4 كوب دقيق منخول
عرفتم بقى ايه هى طريقة 1-2-3-4 وهى طريقة سهلة الحفظ والتطبيق
الطريقة :
نطلع الزبد من الفريزر وهى على وشك التجمد ونضربها باليد لمدة 5 دقائق حتى تلين ويبقى لونها فاتح
وبعدين نضع عليها كوب السكر الناعم ونستمر فى الضرب باليد حتى يصبح لون الخليط ابيض وملمسه كاقشدة وناعم
نخفق البيض مع الفانيليا ونضيف خليط البيض لخليط الزبد بالتدريج ونقلب بالمعلقة ثم فى النهاية نضيف الدقيق المضاف له نصف ملعقة صغيرة جدا بيكنج بودر
بعد ذلك تتكون لديكى عجينة لينة نوعا ما اذا لاحظت انها لينةجدا فهذا معناه ان الدقيق الذى تستعمليه لا يتشرب السمن بصورة جيدة ضيفى كبشة صغيرة دقيق واعجنى العجينة ....
و هقولكم على شوية تكات
:smi39:
العجينه دى هتعطيكى نتيجة بتى فور ناعم وليس هش مقرمش مثل البسكوت وذلك للاسباب التالية
1- لم نستخدم المضرب الكهربائى ابدا لانه بيدخل هواء كتير للعجين بما اننا عايزين البتى فور يطلع ناعم وليس هش مثل البسكوت .. وده خطأ بتقع فيه الكثيرات ... بسمع شكوى من صحباتى انها اتبعت المقادير الصحيحة لكن البتى فور طلع هش مقرمش مثل البسكوت ...
2- انه مش بنضيف بيكنج بودر كتير وذلك لنفس السبب حتى لا تتكون فقاعات داخل البتى فور ويؤدى الى هشاشته وقرمشته لان العجين زى ما انتو عارفين فيها بيض كتير
3- استخدمنا صفار البيض وليس البياض لنفس السبب لان البياض دائما ما يؤدى الى قرمشة العجين
4- البتى فور لا يسوى كثيرا فى الفرن ولا يحمر وجه فقط يصفر قليلا
جربوه ومش هتندموا صدقونى
 
:smil 42:
طريقة الغريبة -- 
:smi39:
المقادير
---------
ا كيلو دقيق نوع كويس
نص كيلوا زبده بدرجة حراره المكان
ربع كيلو سكر بودره منخول
ممكن فانليا او من غيرلو السمن بلدى
-----------------
(بندق-فستق-لوز - سودانى - ملبس فضى )
للتزيين او حسب ما تحبى
الطريقة:
------------
خفق الزبدة جيداً حتى تصير كالقشدة ويبيض لونها .
- يضاف السكر البودرة ويستمر في الخفق.
- يضاف الدقيق تدريجيا إلى خليط الزبدة حتى يتكون عجين لين وناعم.
و تلف بكيس و تترك فى التلاجه لمدة 4 -- 5 ساعات او تبات يكون احسن
علشان متشققش و تكون ناعمه و جميله على مسئوليتى
نخرجها من التلاجه و ندعكها بسيط
- و تُشكل على هيئة كرات صغيرة وترص في صينية على مسافات متباعدة حتى لا تلتصق عند الخبز.
- توضع المكسرات في وسط كل كرة بالضغط الخفيف عليها.
- تُخبز في فرن هادئ درجة حرارته 140 درجة لمدة 15 - 20دقيقة، ويجب عدم تغير لونها.
- تُترك لتبرد تماما، ثم ترص في طبق التقديم وبالف هنا ليكم
:smil 42:
طريقة عمل بسكويت لانكشير 
:smi39:
دى مقاديرى بعمل بيها من سنين
عايزه تجربى جربى فى تلت المقدار يعنى
-----------
كوب دقيق -- كوب نشا -- كوب الا ربع زبده الا معلقه
-- نص كوب سكر بودره
2 بيضه -- تلت باكو بيكنج باودر -- فانليا
المقادير :
-------------
• 3 كوب دقيق.
• 3 كوب نشا.
• 2 كوب سكر بودرة.
• 1/2 1 كوب زبدة لينة.
• 1 باكو بيكنج باودر.
• رشه ملح
• 1 ملعقة صغير فانيليا.
• 6 بيضة.
• للحشو وتزيين : مربى مشمش وجوز هند. و فارمسيل
الطريقة :
------------
• فى العجان نضع الزبدة والسكر مع ونخفقهم جيدا معا حتى تصبح زى الكريمه
• نضيف البيض والفانيليا ونستمر فى الخفق.
• فى بولة عميقة نضع الدقيق ونضيف عليه البيكنج باودر والنشا ورشة ملح ونقلبهم معا.
• نضيف الدقيق تدريجيا على خليط الزبدة والسكر مع العجن حتى تتجانس كل المكونات.
• نقطع العجينة إلى كرات متساوية صغيرة الحجم ونرصها فى الصينية و نضعها فى الفرن الساخن على درجة حرارة 170 درجة مئوية حتى يستوى البسكويت حوالى 15 دقيقة تقريبا.
• نخرجه من الفرن ونتركه يبرد تماما.
------------
• نسيح المربى على النار حتى تسيل قليلا نأخذ كل إثنين من البسكوين وندهن واحده بالمربى ونلصق الأخرى عليها ونضغط بحيث تخرج المربى من الجوانب ندحرجها فى طبق به جوز هند او فارمسيل
حتى يلتصق فى جوانب البسكويت.
• يحفظ فى علبة محكمة الغلق .. وبالهنا ................
:smil 42:
بسكوت السابليه --- 
:smi39:
المكونات.
-------------
3.5 كوبايه دقيق ..
1.5 كوب زبده
3|4 كوب سكر ناعم
1 بيضه
2 معلقه بيكنج بودرصغيره
نص معلقه فانيليا
الطريقه
------------
نخفق الزبدة مع السكر ثم البيضه والفانليا ثم نضيف نضيف باقى المكونات و نعجن كل المكونات نحطها في كيس بلاستيك و نخليها ترتاح ساعة في الثلاجة
نفرد العجينه علي رخامه مرشوشه دقيق فيها ناس بتحب تعمل سابليه بالكاكاو زى البتيفور هتاخدوا جزء من العجينة او نصها وهتضيفولها ملعقة صغيرة كاكاو للتلوين لو تحبواثم ونقطع العجين باي شكل نحبه قلوب مثلثات نجوم اى شكل بالقطاعه سمك نص سم و نعمل نصف الكمية مثقوبة في الوسط ونحطها في الفرن من ٧ ال ١٠ دقايق وبعدين نسيبه ينشف بره الفرن والحشوة بالمربى او نوتيلا او صوص شيكولاته ومكسرات مجروشه
معلومه هامه :- مقادير السابليه هى هى مقادير البتى فور بس تزودى دقيق
يعنى لو عندك عجينة بتى فور زياده زوديها دقيق تبقى عجينه ماسكه شوى
و اعملى بسكوت السابليه
و بالف هنا ليكم يا حبايبى