لسلام عليكم
مساء الخير
عايز افتح النهاردة الحديث في موضوع ما نُطلق عليه
" العقل الباطن "
أو ما يطلق عليه في علم النفس
" العقل اللاواعي "
أو ما يدعي بالإنجليزية
" Unconscious Mind "
هيكون حديث علي مدار يومين اليوم وغداً
==============
ما هو اللاوعي ؟
هو ذلك الكائن الكامن في داخلنا كلنا !
هو ذلك البئر العميق الذي يخبيء بداخله
كل ما تعرفه ولا تعرفه عن نفسك
هو ذلك العدو الذي يقف ضدك دوماً في أصعب الاوقات
وكذلك هو ذلك الصديق الذي يساندك في محنتك
هنتكلم عنه النهاردة كلام سريع
هحاول الكلام يكون بعيد عن مجال التنمية البشرية
نظراً لان كلام كتير خاص باللاوعي هتلاقوه يقال
في كتب ومحاضرات التنمية البشرية
هحاول اختصر جزء كبير في وصفه علي قدر المستطاع !
================
في مقدمة الحديث اللي فوق قلت وصف بسيط
عن اللاوعي ومكانته
خلينا نوضح اكتر الكلام بمثال
كنت رأيته من فترة في وصف اللاوعي
تخيل عندنا فلاح في قرية ، الفلاح ده أتي عليه الموسم الجديد
وعايز يزرع ، الفلاح بيختار المحصول اللي هيجلب له ربح جيد
عشان يعرف يصرف علي نفسه وعلي أسرته
وبالتالي هيبدأ يجهز الأرض كويس ويتآكد ان معاه البذور المطلوبة
والسماد عشان يحصل علي المحصول وبالتالي الربح المطلوب .
هذا بالضبط هو مربط الفرس
انت هنا مكان الفلاح
اللاوعي هنا هو الارض اللي هتزرع عليها
الافكار بتمثل البذور
مثال تاني هيوضح الموضوع اكتر واوضح
لو حد بيتعلم قيادة السيارة
في بداية الامر كل تركيزه مُنصب
علي عجلة القيادة والطريق
تليفونه هيرن حد هيحاول يكلمه
مش هيرد عليه مهما كان
نظراً لان المتحكم فيه دلوقتي
ومسيطر عليه هو عقله الواعي
بعد فترة مااا تقصر أو تطول
هيتعود علي القيادة ويبدأ تدريجياً
اي حد يكلمه يرد عليه ويتبادل الحديث معه
الموبايل يرن يرد عادي ويتابع في الطريق
لان موضوع القيادة انتقل للاوعي !
وبالتالي خلينا نقول أن اللاوعي مسئول عن
أي احساس او شعور او ردة فعل تنتباك بشكل
لا تلقائي لما تتعرض لموقف مفاجيء وجديد
زي الخوف والقلق ساعة الامتحان
لو طالع تقول كلمة قدام الجمهور
هتلاقي نفسك قلقان متوتر وهلم جرا !!
وبالتالي خلينا نعمم ونقول اي حاجة
بتعملها بشكل غير تلقائي
او تتم في جسمك بشكل مستمر
وخارج عن إرادتك “ووعيك”
واقعة تحت سيطرة اللاوعي !
=============
الحاجة التانية والمهمة في موضوع اللاوعي
هو وعاء ومخزن لكل ذكرياتك ولكل اعتقاداتك
والنقطة دي بالذات هي مسببة كل أو
لنقل اغلب المشاكل مع الناس بسبب الشغلانة دي
وهنقول ازاي بس صبراً
==============
وفي حاجتين لازم نقولهم كتمهيد
قبل ما ننتقل إلي كيفية معاملة اللاوعي
أن العقل اغلب ما يكونه هو اللاوعي
تقريبا ما بين 75% إلي 90% !!
الحاجة التانية اللاوعي بيقبل الامور علي علتها
مش عنده القدرة في الجدال والنقاش والتبرير
عكس العقل الواعي ؛ فلو قيل لك فكرة غير متسقة مع ما تؤمن به
فيكون الوعي هو من يدفعك تتكلم وتقول لا غلط ده المفروض كذا وكذا
ومع ان المعارك دوماً مع العقل الواعي
في صالح اللاوعي
إلا ان اللاوعي يتبع اوامر العقل الواعي
دائماً مجرد منفذ لاوامره
وكما قلنا فالافكار والسلوك والاعتقادات مخزنة به
وبالتالي هو دائما يحافظ علي تلك المملكة
وعليك عند التصرف في اي موقف
بما لديه من خبرات سابقة ومعلومات مسبقة
كما يقولون يحفظك في المنطقة والمكان
الذي ترتاح به وبالطريقة التي تعجبك !
وعشان كده والنقطة دي غاية في الأهمية
وقت لما تتصرف بشكل مختلف
او تحاول تتعامل بشكل غير المعتاد عليه
هتلاقي نفسك غير مستريح مطلقاً
بتحاول تعمل حاجة معينة بغير الطريقة
اللي كنت متعود عليها
احساس انك مش متضبط داخلياً هتلاقيه عندك
واحساس لا يمكن تجاهله ، مبعث ذلك الاحساس هو اللاوعي !
ودايما كمان هتلاقي نفسك
تقعد تنوي علي حاجات تعملها وتسويها
بالذات لو حاجات لاول مرة ولكن في اللحظات الاخيرة
تلاقي نفسك تنحت ومعملتش حاجة ، برضو بسبب اللاوعي
بيجرجرك وبيشدك للمنطقة اللي انت عودت نفسك تكون فيها !
كأنك بالضبط نزلت برامج بداخلك
كل برنامج بيتصرف طبق الاوامر اللي عنده
وقت تيجي تتصرف خارج اطار الاوامر دي
البرنامج مش هيشتغل !
وعشان كده هي نصيحة
ممكن تكون سهلة علي البعض
مستحيلة علي البعض
دايما اكسروا الروابط الشديدة دي
حاولوا بقدر المستطاع
تطلعوا برا المنطقة اللي بتريحكم
لان المنطقة دي استمرارها
هيخليكوا تحسوا بملل رهيب
حاولوا توسعوا المدارك الخاصة بكم
حاولوا تنزلوا برامج جديدة مكان البرامج القديمة
وفكرة مكان دي هنوضحها بكرة إن شالله
ليه مكان مش مع
كده عرفنا اية هو اللاوعي وبيعمل ايييية ؟
غداً سنكمل ازاي نتعامل معاه واية هي قوانينه
وبالمرة وسط الكلام نعطي شوية نصايح عشان نتجنب مشاكله
شكراً
ونأسف للإطالة )
=======================