ربـاعيّـات صلاح جـاهيـن
ربـاعيّـات صلاح جـاهيـن

يا وردة قلبي معاكي في الريح لعب
لا تعبتي من الريح ولا قلبي تعب
احنا كده.. نرتاح في صخب الجنون
وفي السكون بنخاف قوي ونترعب
عجبي
*******
مركب ورق من نفخة تتطوّح
ركبتها والكل بيلوّح
سوحت فيها اتنين وخمسين سنة
للآن.. ولا بتغرق ولا تروّح
عجبي
*******
عالجسر فُتّ الصبح تحت الضباب
بين اللي لسه بينغرس واللي طاب
ما اهتز قلبي لنبت طالع جديد
قد اللي ماشي.. وتحت باطه كتاب
عجبي
*******
ياخالق الكون بالحساب والجَبر
وخالقني ماشي بالاختيار والجبر
كل اللي حيلتي زمزمية أمل
وازاي تكفيني لباب القبر؟
عجبي
*******
حتة محارة وجدتها في يوم لقيّة
قالت لي شوف كيف الطبيعة شقيّة
نظرت للكهف اللي فيها ولقيت
إن الطبيعة كمان لا أخلاقية
عجبي
*******
نقطة مرارة كمان على مشروبي
دوبها يا ساقي حسب مطلوبي
طبع الحياة.. مش برضه فيها وفيها؟
ليالي وردي ونهارات خروبي؟
عجبي
*******
وسط الحطام اتفرجوا يا أنام
تمثال ملك.. ومَبْوَلَه م الرخام
الاتنين نحتهم نفس أسطى الحجر
وكانوا ذات يوم كتلتين لسه خام
عجبي
*******
عيد والعيال اتنططوا ع القبور
لعبوا استغمايه.. ولعبوا بابور
وباللونات ونايلونات شفتشي
والحزن ح يروح فين جنب السرور
عجبي
*******
أنا قلبي كورة والفراودة أكم
ياما اتنطح وانشاط وياما اتعكم
و اقول له كله ح ينتهي في المعاد
يقول بساعتك؟ ولاّ بساعة الحكم؟
عجبي
*******
الضحك قال يا سم ع التكشير
امشير وطوبه وانا ربيعي بشير
مطرح ما باظهر بانتصر ع العدم
انشالله أكون رسماية بالطباشير
عجبي
*******
ياملونين البيض في شم النسيم
لون الحنين والشوق وخمر النديم
ما تعرفوش سايق عليكو النبي
تلونوا الأيام بلون النعيم؟
عجبي